كلمات اغنية | أحمد مكى - وقفة ناصية زمان

إنت فاكر رمضان , كان الناس بتعلق زينة

و بتحط ساعات نشارة ملونة .
كنت لسة هقولك عليها
و بيجوا بواحد يعمل فريم أبيض بدقيق و لا بجبس و يرسم جوة , ده كان فن .
حبل النور فيشته كانت بتتوزع كل يوم على شقة
إنت فكرتنى بدى كانت رهيبة برضه ,,, أه.
أه طبق هو بيجيلك و بيترد و توديه و يجيلك و تعمل انت حاجة تملاه و تبعته و يرجعلك تانى دى كانت جميلة .
ليها معنى كبير طبعا ماحدش يشيل لوحده .
الطبق الى دايما طالع نازل فى كل شقق العمارة .
دلوقتى الموتوسيكل يخش ع البنت عليه تلاتة يخشوا و يقلبوا شنطتها , يقلبوها من دراعها و ياخدوا منها أى حاجة ممكن يقرصوها أصلا, من غير أى سبب , و لا عملوا حاجة و لا خليوا من الحاجة , زمان البنت و هى مروحة كانت أول ما بتخش المنطقة خلاص كأنها دخلت البيت آمان ,
و الدار آمان
فاكرين و لا نقول كمان
وقفة ناصية زمان إدتنا إزاى نملك لسان
موزون بيلاغى الصايع و الضايع و الجنتلمان
كله سيان ,,
قابلنا كل أنماط جنس الإنسان
و إتعاملنا فإتبنى جوا الدماغ بوصلة و ميزان
فى جزأ الثانية بنعرف نفقس مين جدع و مين جبان
و مين تشوفه تقول ده هادى و لو نكشته تشوف جنان
و مين بقلب مات و أسود و مين قلبه بينبض حنان
الكلام ده شفته بعينى فى وقفة ناصية زمان
و مين غلبان و مين شيطان و جن و قرد و بهلوان
حتى الشقاوة ع الناصية كان ليها أصول
كات وصمة عار كبيرة إنك تضرب واحد من الضهر
الخناق راجل لراجل مش راجل قصاد أسطول
حصل هيحصلك عار يوصلك للقبر
تحس الكل كان مؤمن القوى فى الأقوى منه
ماكانش العادى إن القوى بيكسر الأضعف منه
من أول محترم شقى حتى المجرم كمان
و فى كمان لغات جسد سبيل مثال
كنا عزوة للحتة وقفتنا تحبها
ياما وقفات دلوقتى الناس تتمنى هدها
ألفاظ شمال بصوت عالى و ريحة حشيشها فايحة منها
كان يا ما كان وقفة ناصية زمان
إزاى ولاد الحتة يبقوا هما مصدر همها
وقفة الناصية إتعلمنا فيها كتير لغات
السغة لمون ( و هى لغة يتكلم بها البعض فى المناطق الشعبية مثل منطقة الطالبية بالهرم ) كانت لغة بنرغى بيها لساعات
لو فى غريب مابينا و مش عاوزين يفهم معنى الحاجات
ساسب حواجب سفهم يتنيل ساجة حالات ( حاسب يفهم حاجة )

يومى كله كان خبرات بشر من فجرى لحد نومى
دى العيدية , و دى الجيزة فوق الكوبرى , و دى الطالبية .
و دى التلات طوابق إلى ناسها مية مية
وقفة الناصية كانت زى النادى تمام
و ده الهرم و دى نفض , و دى صبرك عليا
وقت الرغى فى الهواية مابيخلصش فيه الكلام
إتعلمنا فيها هواية إن كانت كلاب أو حمام
الحاجة أم الإختراع إسعى إتوكل تتم
مافيش فلوس عادى برضه مابتموتش الأحلام
عملنا بإيدينا ملعب غية و طبلية و جيم
منطقتى هى الطالبية
ماكانش فيه آيباد تابلت واتساب فيسبوك واكلينلى يومى
مش معزول و منطوى قدام شاشات و بالساعات
ياما حلينا ع الناصية كتير مشاكل و حوارات
وسط ناس و مجتمع بشارك فيه بكتير حاجات
أخد الحق حرفة تبات ولعة تصبح رماد
فاكرين ولا نقول كمان
على وضعك يا عم مكى
يا ليلى يا عين يا ليلى

كلمات اغنية أحمد مكى , أغلى من الياقوت

يوم ما للدنيا إنت جيت أول علاقتى بيك صوتك ما بينى و بينك حيط . سمعت صوتك إستغربت إتلخبطت إتشديت قلبى إتنفض ما بين ضلوعى و م الفرحة بكيت. أول ما شفتك الدنيا لفت بيا . ربى حبنى و وهب ليا من عنده هدية . سرحت فيك ساعات فيك منى كتير حاجات. يا رب تاخد منى بس الحلو فى الصفات . و فى وسط زحمة فرحتى فجأة هجم سكات مخلوط صور أبيض فى أسود من إلى عشته و من إلى فات . يمكن عشان الضلمة فى طفولتى كانت أكتر من نور. عيل صغير قال بسم الله وقام يعدى فى بجور. مش شايف شط أو ميناء لآخر البصر مافيش أمل كان نفسى فى حد يعلمنى و ينصحنى و يبقالى المثل. ربك حمانى و إتولانى برحمته مافيش جدل بعد ما كل سكة إتسدت و إسودت و الباب قفل . يا رب يا كريم إهدينى و قوينى و وفقنى لسكة تربيته على الشىء السليم عارف إنى مش مثالى بس طمعان فى كرمك تخلى حاله أحسن من حالى . و انا أوعدك يا رب هحاول أبقى أحسن أب و أديه إلى ما شفته فى نهر طفولتى إلى نضب. كل يوم بيعدى و أشوفك فيه بتكبر يتفاجىء , إن صفاتى بتظهر فيك أكتر و أكتر إبتسامتى و ضحكتى و المشى و حتى تكشيرتى حتى نومتك رجل فوق رجل دى نسخة من نومتى. قبل وجودك الدنيا ماكانتش فارقة معايا . قلبى ده كان خلاص قلب حجر دى مش كناية جلدى تخن من قسوة الدنيا و مر الحكاية بقيت زعلان على الشخص إلى شايفه فى المراية. لحد ما إنت جيت غيرتنى و كنت الهداية. فتحت بإيدك كل أبواب الرحمة جوايا . لما بحضنك و أحس دقة قلبى جنب قلبك مية فى المية ما حبتش فى الدنيا قبلك. لما بحضر أول مرة ليك فى أى حاجة قلبى بيرفرف و أحس بألف حاجة و حاجة. إحساس غريب جزأ منى إتحول إنسان بيزعل و بيفرح و بيزرع جوايا الحنان خايف عليك من الدنيا يا إبنى مالهاش أمان و بدعى ربنا يحميك و يصونك هو الرحمن كتبت رسالة ليك عشان لو قدرى وقته حان و مش مكتوب ليا أكون جنبك لآخر الإمتحان عاوزك تكون صاحب عزيمة فولاذ حديد مهما الدنيا تحبطك صمم خليك عنيد خليك واثق فى نفسك عن حلمك إياك تحيد مهما إسود الليل و طال هيطلع فجر جديد عاوزك لربك شاكر و جهد الناس تقدر و إوعى تظلم مهما كنت قادر, ربك أقدر إوعى تفضح عيب إنسان لو ربك ستر كما تدين تدان ما تضمنشى القدر لو قلت كلمة حق و الناس قامت عليك كأنهم قالولك مبروك تسلم إيديك عشان الكلب الميت ضربه مش مطلوب لكن لو كان شجر مثمر بيتحدف بالطوب لو يوم ذنوبك تقلت إرجع لربك توب ربك لو حبك هيحبب فيك كل القلوب ساعات بسرح و بسأل نفسى و الدماغ تفكر يا ترى حتبقى فعلا ضهرى لما أكبر لما العجز يبدأ ينهش فيا و يجور عليا فى عز إحساسى بضعفى هيكون قلبك عليا لما اللسان يتقل و الكلام يصبح بطىء و أعيد نفس الكلام أكتر من مرة أرجوك تطيق يا ما طلبت منى أعيد حكى الحدوتة كتير و فى كل مرة أعيدك قلبى كان بيطير لما تلاقينى قدمت و مش مواكب عقل جيلك ما تركنيش لجهلى , علمنى من غير ما أجيلك خليك عنيا نورلى طريقى لمنتهاه و إفتكر إنى من علمك معنى الحياة. لما أبطل أمشى لوحدى خطوتين لما أكون أضعف إنى أشرب من غير معين لما تموت الذاكرة و بالعافية أعرف إنت مين وجودك جنبى كفاية لحد ما يجيلى اليقين كلمتين هقولهم عندى أغلى من الياقوت كنت معاك يوم ولادتك عايزك جنبى يوم ما أموت